БИШКЕК, 17-окт. — Sputnik. Мамлекеттик ипотекалык компания Жалал-Абад шаарында 9 кабаттуу төрт үйдүн курулушу башталганын билдирди.
Курулуштун капсуласын салуу аземине катышкан МИКтин жетекчиси Алмамбет Шыкмаматов бул үйлөр "Менин үйүм — 2021-2026" турак жай программасынын алкагында 25 жылга ипотекага берилерин айтты.
Курулуш иштерин 2024-жылы бүтүрүү пландалган. Анда 1, 2, 3 бөлмөлүү 639 батир салынат.
Белгилей кетсек, ипотекалык үйлөр аймактардан биринчи болуп Жалал-Абадда салына баштады. Жеткиликтүү ипотекалык үйлөр Бишкекте былтыртан тарта курула баштады. Буга чейин Садыр Жапаров ипотекага бериле турган үйлөрдү курууга өлкөнүн ар аймагынан жер тилкелери бөлүнүп жатканын билдирген.