БИШКЕК, 17-окт. — Sputnik. Вебкам-студиялардын трансулуттук тармагын уюштурган делип камакка алынган Даниэл Ажиевдин мыйзамсыз ишмердүүлүктөн тапкан 500 миң доллары алынганын УКМК кабарлады.
Эскерте кетсек, көп сандагы вебкам-студияларын түзгөн кылмыштуу топтун жетекчиси делген Даниэл Ажиев 5-июнда кармалып, кийин камактагы мөөнөтү узартылган.
УКМК Ажиевге байланыштуу кылмыш ишин тергөө уланып жатканын белгиледи. Анын жүрүшүндө чекисттер Ажиевдин вебкам-студияларында 18ден 25 жашка чейинки 300гө жакын адам интимдик мүнөздөгү кызматтарды көрсөтүп келгенин билдирген. Кылмыштуу кирешеси айына 300 миң долларды түзүп келген.
"Кылмыш иши боюнча аталган топтун сегиз мүчөсү жоопкерчиликке тартылган, анын алтоо кармалып (арасында Ажиев да бар), экөөнө издөө жарыяланды. Айыпталуучунун кылмыштуу ишмердүүлүгүнөн тапкан активдери изделип жаткан маалда Ажиев баш коргоо чарасын өзгөртүүнү суранып 500 миң доллар сунуштаган. Натыйжада жубайындагы аталган сумма мыйзам чегинде алынды. Мындан улам Ажиев демөөрчүлүк иретинде өлкө бюджетине 44 миллион сом которду деген маалымат чындыкка дал келбейт", — деп айтылат маалыматта.
УКМК, мындан тышкары, Ажиевдин кыймылдуу жана кыймылсыз мүлкү камакка алынганын, анын ичинде кымбат баалуу автомашиналар жана батирлер бар экенин белгиледи.
"Ажиевге байланыштуу кылмыш иши жыйынтыкталууда, айыптоо актысы бекитилгенден кийин сотко жөнөтүлүп, иш карала баштайт", — деди атайын кызмат.