БИШКЕК, 16-окт. — Sputnik. Президент Садыр Жапаров "Кабар" агенттигине маек куруп, кримтөбөл Камчы Көлбаевдин жок кылынган операция тууралуу айтты.
Өлкө башчыга операция даярдалып жатканы тууралуу маалыматы болгон-болбогону жана Көлбаевдин жок кылынышынын мыйзамдуулугу жөнүндө суроо узатылган. Жапаров кабарды көпчүлүк сыяктуу эле интернет булактарынан окуганын айтты.
"Дароо эле башкы прокурорго чалып: "Аскер прокуроруңду алып, өзүң барып, жеринен көрүп мага так маалымат берчи" деп жибердим. Ал барып, жеринен көрүп мага кайра чалды. "Атышуу болуптур, өлүм бар экен, жарадарлар бар экен" деди. Операция кандай болгон, мыйзамдуубу же мыйзамсызбы тез арада тергөө иши жүргүзүлсүн деп иш Аскер прокуратурасына берилди. Азыр тергөө жүрүп жатат. Жыйынтыгын күтөлү", — деди президент.
Жапаров өнүккөн мамлекеттерде кримдүйнө деген түшүнүк жок экенин, криминалдык чөйрө мамлекеттин эле эмес, жарандардын, инвесторлордун да ишмердигине терс таасир этерин белгиледи.
"Каракчылык заманды унутуш керек. Азыр эшикте 21-кылым. Баары мыйзам чегинде болушу зарыл. Кимдир бирөө каракчылык кылса, жабыркаган тарап сөзсүз түрдө күч органдарына кайрылышы шарт. Биз тез убакытта өнүккөн мамлекетти курушубуз керек. Ансыз деле алыс барбай эле коёлу, кошуна мамлекеттерден бир канча жылга артта калып кетиптирбиз", — деди өлкө башчы.
Эскерте кетсек, "мыйзамдагы ууру" атыккан кримтөбөл Камчы Көлбаев 4-октябрь күнү жок кылынган. Операцияны УКМК жүргүзгөн.