БИШКЕК, 16-окт. — Sputnik. Россия лидери Владимир Путин Египеттин, Сириянын, Ирандын жана Палестинанын президенттери Абдель Фаттах ас-Сиси, Башар Асад, Эбрахим Раиси жана Махмуд Аббас менен телефондон сүйлөшкөнүн Кремлдин маалымат кызматы билдирди.
"Сүйлөшүүдө негизги кеп Палестина-Израиль чатагынын курчуп кеткени боюнча жүргөн. Ири масштабдуу согуштук аракеттерге, аны коштоп адамдардын, жай жарандардын өмүрүнүн кыйылып жатышына, Газа секторундагы улам тереңдеп бара жаткан гуманитардык кризиске тынчсыздануулар айтылды", — деп белгиленген маалыматта.
Мамлекет башчылар тез арада согуш отун токтотуп жана гуманитардык жарашууну орнотуу зарыл деген пикирге келишкен.
Путин Газа секторундагы курчоону тиричиликке керектүү буюмдарды, азык-түлүк жана дары-дармектерди жеткирүү үчүн алып салуу зарылдыгын белгилеген кесиптештеринин пикирин уккан.
“Чатактын аймакты камтыган ири согушка айланып кетиши боюнча олуттуу тынчсыздануулар айтылды”, — деп кошумчалашкан Кремлден.
Путин жай жарандарга карата жасалган зомбулуктун бардык түрлөрү кабылданбай турган кадам экенин белгилеп, Россия гуманитардык жардам көрсөткөнгө макул экенин билдирген.
Москва согуштук аракеттерди мүмкүн болушунча тез арада токтотуу үчүн бардык “конструктивдүү өнөктөштөр” менен кадамдарды координациялоого даяр.
“Россиянын БУУнун Коопсуздук кеңешине тез арада гуманитардык элдешүүнү жарыялоо боюнча сунуштаган резолюция долбоорунун тең салмактуу жана саясатташтырылбаган максаты дал ушул”, — деп белгилешкен Кремлден.
Президенттер мындай кырдаалдын келип чыгышына Жакынкы Чыгышта абалды жөндөө иштеринин токтоп калганы себепкер болгонуна токтолушкан. Путин Россиянын позициясын кайрадан белгиледи. Ал кырдаалдан Израиль менен өз ара тынчтыкта жашай турган көз карандысыз Палестина мамлекетин түптөгөн адилеттүү чечим менен гана чыгууга болорун айтты.
Египеттин президенти Путин менен сүйлөшүп жатканда россиялык, КМШлык жарандардын Газа секторунан эвакуацияланышына Каирдин кадамдарын ортого салды.
Палестин-Израиль чатагы 7-октябрда жаңыча өңүт алып, тирешүү күчөп кан төгүлдү. Газа секторунда каза тапкандардын саны эки миң адамга, ал эми Израиль тараптагылардыкы миң кишиге чукулдап барды. Эки жактан тең бир нече миң жаран жаракат алды.
Эки жактан тең тирешүү күчөдү. Кийинки маалыматтарга таянсак, анклавдагы курмандыктардын саны 2,4 миң кишиге чукулдаган.