БИШКЕК, 16-окт. — Sputnik. Камчы Көлбаев жок кылынган операциянын мыйзамдуулугу тергелип жатат. Бул тууралуу президент Садыр Жапаров "Кабар" агенттигине маек куруп жатып айтты.
Өлкө башчы кримтөбөлдүн жок кылынганын көпчүлүк сыяктуу эле интернет булактарынан окуганын белгилеген.
"Операция кандай болгон, мыйзамдуубу же мыйзамсызбы, тез арада тергөө иши жүргүзүлсүн деп иш Аскер прокуратурасына берилди. Азыр тергөө жүрүп жатат. Жыйынтыгын күтөлү", — деди Жапаров.
Эскерте кетсек, "мыйзамдагы ууру" атыккан кримтөбөл Камчы Көлбаев 4-октябрда жок кылынган. Атайын операцияны УКМК жүргүзгөн.