БИШКЕК, 16-окт. — Sputnik. Иран үчүн Израилдин Газа секторуна жер үстүнөн жасаган операциясы "кызыл чийин" болуп эсептелет, мындай жагдай "жаңы фронттордун ачылышы" менен кооптуу. Бул тууралуу Ирандын Улуттук коопсуздук жана тышкы соода боюнча парламенттик комиссиясынын жетекчисинин орун басары Эбрахим Азизи айтканын РИА Новости жазды.
"Израилдин Газага жасалган чабуулу кызыл чийин болорун, Палестина Тель-Авивдин мындай орунсуз ката кетиришин күтүп жатканын түшүнүшү керек. Эгер Израиль режими буга барып, ракеталык соккуларын токтотпосо, бир эле эмес, ар тараптан жаңы фронттор ачылат", — деген маектеш.
Анын айтымында, Палестинанын каршылык фронтунун "чеги дээрлик жок", Израиль "бет келген жерден чабуулга дуушар болот".
Азизи бир нече фронттогу куралдуу кагылышуу "Израиль бийлиги менен мамлекетинин кыйроосун шартташы мүмкүн" экенин кошумчалады.
Буга чейин БУУнун алдындагы Тегерандын өкүлчүлүгү эгер республиканын аймагы чабуулга тушукпаса Иран армиясы Израилдин Газадагы операциясындагы кагылышууга аралашпай турганын айткан.
Ошол эле учурда Axios басылмасы өз маалымат булагына таянуу менен Иран дипломатиялык байланыштары аркылуу Израилге араб-израилдик чырдын регионалдык согушка айланышын каалабай турганын, бирок Тель-Авив кол сала турган кийлигишүүгө аргасыз болорун айтып, кайрылуу жөнөткөнүн кабарлады.
Ал арада АКШ президенти Жо Байден Иран менен "Хезболлах" кыймылына Палестина-Израиль чырына аралашуудан алыс болушу керектигин эскертти.
Тараптардын аймактык кызыкчылыгы менен байланышкан палестиндик-израилдик жаңжал ондогон жылдардан бери региондогу кагылышуунун себепкери болуп келет. СССРдин кийлигишүүсү менен 1947-жылы БУУ Израиль жана Палестина мамлекеттерин түзүү чечимин кабыл алган. Бирок натыйжада Израиль гана түзүлгөн. Тель-Авив эки өлкө принцибине макул болгону менен палестиналык аймактарды бошотпой келет.
7-октябрда Израилге Газа сектору тараптан чабуул жасалганы боюнча маалыматтар тараган. Аталган өлкөнүн билдиргенине караганда, ХАМАС аскерлери ракета менен жапырт аткылаган соң Израилдин түштүгүндөгү чектерине кирип келген. Аталган уюмдун аскер канаты жарыялаган аскердик операциясын "Аль-Акса топон суусу", ал эми Израиль тарап "Темир кылыч" деп атады.
Эки жактан тең тирешүү күчөдү.
Израиль мурдараак Газа секторунун блокадада каларын жарыя кылып, суу, электр кубаты, дары-дармек жана отун берүү токтотулган.
Кийинки маалыматтарга таянсак, анклавдагы курмандыктардын саны 2,4 миң кишиге чукулдаган.
Мындан бир нече күн мурда ХАМАСтын колунда 150 израилдик бар экени айтылган.