БИШКЕК, 16-окт. — Sputnik. Израилдин Газа боюнча 2021-жылдын май айынан тарта 2023-жылдын августуна чейин жасаган теңме-тең келбеген чабуулдары согуштук кылмыш деп эсептелет, ал эми Газага гуманитардык жардамдын киришине тыюу салуу эл аралык мыйзамдарды бузгандык болуп саналат. Бул туурасында БУУнун Израилдеги жана палестин аймагындагы окуяларды иликтеген көз карандысыз комиссиянын докладында айтылганын РИА Новости жазды.
"Ошондой эле отчетто Израилдин кол салууларынан (Газада - ред.) келтирилген зыяндар жана жоготуулар аскердик күч жагынан бирдей болбогону, андыктан бул иштер согуштук кылмышы экени белгиленет. Комиссия, мындан сырткары, Газага делген азык-түлүк менен дары-дармектин ташылып киришине тыюу салуу эл аралык гуманитардык укукту бузгандык болорун белгиледи”, — деп айтылган документте.
Комиссиянын мүчөлөрү "Аль-Жазиранын" журналисти Ширин Абу Акленин өлүмүн иликтеп чыккан. Алар израилдик куралдуу күчтөр эл аралык адам укуктары мыйзамынан алып караганда “акталбай турган” жана “атайылап же ойлонбой” күч колдонуп анын өмүрүн кыйган деген тыянакка келишкенин баса белгилешти.
“Ширин Абу Акленин Женинде өлтүрүлүшү Израилдин Батыш жагында, анын ичинде Чыгыш Иерусалимдеги укук коргоо органдарынын операцияларын милитаризациялоосунун түздөн-түз натыйжасы. Ширин Абу Акле — бул операцияларда Израилдин коопсуздук күчтөрү колдонгон ашынган жана теңме-тең эмес күчтөрдүн дагы бир курмандыгы болду. Бул журналисттерге кол салуу болду, баары такталды. Бул кайталанып келе жаткан нерсе экендигин комиссия аныктады”, — деп комиссиянын төрагасы Нави Пиллэйдин айтканы документке түшүрүлгөн.
Эске салсак, мурдараак "Аль-Жазира" Израилдеги, Палестинадагы кабарчысы Ширин Абу Акленин өлтүрүлүшү боюнча Гаагадагы эл аралык сотко кайрылган. Медиахолдингдин юристтери жыйнаган далилдерге караганда, израилдик аскерлер ок чыгаргандан башка ал жерде (журналист турган жерде) эч кандай атышуулар да, кагылышуулар да болгон эмес. Ширин 2022-жылы майдын башында Иордандын батыш жээгинде, Женинде Израиль армиясынын контртеррордук операциясын чагылдырып жатканда өлтүрүлгөн.
Израиль армиясынын маалымат кызматы сентябрда аскер прокурору "Аль-Жазиранын" журналисти Ширин Абу Акленин өлүмү боюнча иш ачып, аскер полициясынын тергөөсүн жасоого эч кандай негиз жок деген бүтүмгө келгенин билдирген. Баллистикалык экспертизага октун начардыгынан улам анын кайдан атылганын билүү кыйынчылык жаратууда деген нерсе айтылган.