"Алтын түйүн" балдар инженердик-техникалык улуттук академиясы менен Россиядагы "Орлёнок" борбору беш жылга келишим түздү. Бул тууралуу Жаркын Бапанова Sputnik Кыргызстан радиосунун эфиринде маек куруп жатып билдирди.
Анын айтымында, балдар үчүн лагердин орду чоң.
"Лагерь — баланын калыптанышына мыкты мүмкүнчүлүк. Анткени ал жактан жаңы нерселерди көрүп, жаңы маалыматтарды ала алат. Эл аралык лагерь өлкөлөр арасындагы достук мамилесин да бекемдөөгө шарт түзөт. Биз келишим түзгөн Россиянын "Орлёнок" борбору менен азырынча беш жыл кызматташууну пландап жатабыз. Буюрса андан кийин да иштешебиз деген ишеним бар. Аталган борбордун 10 лагери бар, 11-16 жаштагы балдарды кабыл алат. Ал жакка барган балдар чет тилин үйрөнүүгө шыктанып, дүйнө таанымын кеңейтет. Аң-сезимин өстүрүүгө жардам берет. Бара турган балдардын каражат маселесин кантип чечүүнү ойлонуштуруп жатабыз. Балким балдарга стимул болсун деген демөөрчүлөр чыгып калар. Кыргызстан эгемендүүлүк алгандан кийин биринчи жолу балдарды январь-февраль айларында "Орлёнок" борборуна жиберет", — деди Бапанова.
Ал "Алтын түйүн" балдар инженердик-техникалык улуттук академиясынын филиалдары жети облуста тең бар экенин кошумчалады.