БИШКЕК, 16-окт. — Sputnik. БАЭ Кыргызстанга жаштардын футбол академиясын салышы ыктымал. Бул тууралуу өкмөттүн маалымат кызматы кабарлады.
Министрлер кабинетинин төрагасы Акылбек Жапаров Абу-Даби шаарына болгон сапарында БАЭнин энергетика жана инфраструктура министри Сухейл Аль-Мазруи менен жолугуп, сүйлөшүүлөрдү жүргүзгөн. Өкмөт башчы аталган өлкөгө Соода жана өнүктүрүү боюнча дүйнөлүк инвестициялык форумдун 8-сессиясына катышуу үчүн барган.
Министрлер кабинетинин төрагасы Акылбек Жапаров Абу-Даби шаарына болгон сапарында БАЭнин энергетика жана инфраструктура министри Сухейл Аль-Мазруи менен жолугуп, сүйлөшүүлөрдү жүргүзгөн
© Фото / пресс-служба кабинета министров КР / Эргеш Жусубалиев
"Жолугушууда тараптар Кыргызстанда инвестициялык долбоорлорду ишке ашыруу үчүн негиз боло турган "Абу-Даби Кыргыз Инвестмент" биргелешкен холдингинин ишмердүүлүгүн талкуулашты. Ошондой эле жаштардын футбол академиясын куруу долбоорун талкуулап, эмирликтин министрине эскиз жана долбоордун эсеби берилген", — деп айтылат маалыматта.
Мындан тышкары, Жапаров жана Сухейл Аль-Мазруи энергетика, гидроэнергетика жана энергиянын кайра жаралуучу булактарын өнүктүрүү долбоорлорун ишке ашыруунун жүрүшүн кеңири талкуулашкан. Тагыраагы, "Масдар" компаниясы тарабынан Ысык-Көл облусунда күн фотоэлектр станциясынын курулушу тууралуу сөз болгон. Сүйлөшүүлөрдүн жыйынтыгында эки тарапты кызыктырган бардык долбоорлорду тездетүү боюнча макулдашууга жетишилгени кошумчаланды.