БИШКЕК, 15-окт. — Sputnik. Смартфондун кубаты көпкө жетиши үчүн анын айрым функцияларын өчүрүү керектигин Sputnik радиосуна курган маегинде IT-технологиялар тармагынын эксперти Никита Мокеев түшүндүрүп берди.
Адистин айтымында, негизи телефондогу функциялар керектөөчүнүн ыңгайы үчүн киргизилген, бирок энергияны үнөмдөө үчүн анын айрымдарын өчүрүүгө болот.
"Смартфон жаңы кезинде энергияны аз сарптайт, бирок эки жылдан кийин аккумулятор энергияны көпкө кармай албай калат. Мисалы, телефондо басып чыгаруунун системалык сервиси бар. Ал дайыма уюлдук телефондогу документтерди чыгаруу үчүн принтерди издөө функциясын аткарат. Тууралоо (настройка) функциясынан бул сервисти өчүрүп койсо болот. Мындан тышкары, жеткиликтүү Wi-Fi таратуучуну издеген система бар, ал күйүп турса да дайыма энергия коромжуга учурайт", – деген Никита Мокеев.
Ошондой эле телефонго көчүрүлгөн тиркемелерге да маани берүүнү сунуштаган. Алардын көбү смартфонду күйгүзгөндө эле автоматтык түрдө иштей баштайт.
"Ал тиркемелер автоматтык түрдө иштеп, кандайдыр маалыматтарды өткөрүп турат. Эгерде керектөөчү ал тиркемелерди тынымсыз колдонбосо, автоматтык түрдө ишке киришүүчү функциясын өчүрүп койсо болот. Мындан тышкары, айрымдар вибрацияны кошуп алышат. Мындайда телефондун ар бир клавишасын баскан сайын көбүрөөк энергия жумшалат, андыктан аны өчүрүп коюудан эч кандай ыңгайсыздык жаралбайт", – деген эксперт.
Мокеев керексиз функцияларды өчүрүү менен смартфондун кубатын 10 пайызга үнөмдөөгө болорун кошумчалаган.