БИШКЕК, 13-окт. — Sputnik. БУУнун палестиналык качкындарга жардам берүү жана аны уюштуруу иштери боюнча агенттиги (UNRWA) ыкчам жана эл аралык персонал борборун Газа секторунун түштүгүнө көчүрдү. Бул туурасында РИА Новости жазды.
"UNRWA гуманитардык операцияларды улантуу жана Газадагы палестиналык качкындарга, өзүнүн кызматкерлерине колдоо көрсөтүү үчүн ыкчам жана эл аралык персонал борборун Газа секторунун түштүгүнө көчүрдү", — деп айтылат агенттиктин маалыматында.
Агенттик БУУнун мектептери жана башка баш калкалоочу объектилери эл аралык гуманитардык укуктардан улам бомбалоого алынбашы керектигин айтты.
7-октябрда Израилге Газа сектору тараптан чабуул жасалганы боюнча маалыматтар тарады. Аталган өлкөнүн билдиргенине караганда, ХАМАС аскерлери ракета менен жапырт аткылаган соң Израилдин түштүгүндөгү чектерине кирип келген дешүүдө. Аталган уюмдун аскер канаты жарыялаган аскердик операциясын "Аль-Акса топон суусу", ал эми Израиль тарап "Темир кылыч" деп атаган.
Чатак башталгандан бир нече күндөн кийин израилдик аскерлер Газага чектеш жерге авиация менен чабуул кое баштаган. Ал жерде секторго тиешелүү жарандык объектилер болгон. Израиль мурдараак Газа секторунун блокадада каларын жарыя кылып, суу, электр кубаты, дары-дармек жана отун берүү токтотулган.
Азыр эки жактан тең каза тапкан жай жарандардын саны миңден ашканы, андан сырткары, бир нече миң палестиналык, израилдиктер жаракат алганы айтылууда. Соңку маалыматтарда ХАМАСтын колунда 150гө чукул израилдиктин туткунда турганы кабарланган.