ЖАЛАЛ-АБАД, 11-окт. — Sputnik. Россия-кыргыз аймак аралык Х конференциянын жыйынтыгында 3,5 миллиард долларлык документ менен келишимдерге кол коюлат. Бул тууралуу өкмөт башчы Акылбек Жапаров конференциянын пленардык жыйынында билдирди.
Министрлер кабинетинин төрагасы Россия Кыргызстандын негизги соода өнөктөштөрүнүн бири экенин белгилеген.
"Тарыхый союздук байланыштар, стратегиялык өнөктөштүк жана бирдиктүү интеграциялык аймакта жайгашуу Кыргызстан менен Россиянын көп тараптуу кызматташуусунун бекем пайдубалы болуп келет", — деди Жапаров.
Анын айтымында, 2018-жылдан 2022-жылга чейинки статистика боюнча, эки тараптуу соода жүгүртүүнүн көлөмү 1,8 эсеге өстү. Өткөн жылы товар айлантуу 3,4 миллиард долларды түзүп, рекорд койгон.
"Азыркы дүйнөлүк экономикадагы татаал кырдаалга карабастан эки өлкөнүн товар жүгүртүүсүнүн көлөмүн 5 миллиард долларга чейин жеткирүүгө бардык мүмкүнчүлүктөр бар экенин билебиз", — деди ал.
Жапаров сөзүнүн соңунда президенттин Жалал-Абаддагы ыйгарым укуктуу өкүлү "АБ Энерго" ЖЧКсы менен инвестициялык долбоорлорду ишке ашыруу жана Жалал-Абад облусунда 660 мегаваттык көмүр жылуулук электростанциясын куруу боюнча келишимге кол коёрун белгиледи. Анын баасы 2 миллиард 300 миллион долларды түзөт.