ЖАЛАЛ-АБАД, 11-окт. — Sputnik. Кыргызстан менен Россия өнөр жай кооперациясы боюнча кандай долбоорлорду ишке ашырып жатканын Соода-өнөр жай палатасына караган Инвестициялык ишмердүүлүк департаментинин башчысы Элмырза Үкүбаев айтып берди.
Ал учурда өтүп жаткан Россия-кыргыз аймактар аралык конференцияда сүйлөдү.
Үкүбаевдин айтымында, Кыргызстан менен Россиянын Соода-өнөр жай палаталарынын ортосунда 50 ири долбоор каралып жатат. Департамент жетекчиси иштелип чыгып жаткан долбоорлор катары төмөнкүлөрдү тизмектеп берди:
медициналык каражаттарды өндүрүү боюнча завод;
тери буюмдарын өндүрүү боюнча завод;
машина куруу комплекси;
тери иштетүүчү завод;
айыл чарба техникасын өндүрүү.
"Тери иштетүүчү завод Эркин экономикалык аймакта беш гектар жерде жайгашат. Долбоор өзүн алты жылдан кийин актай баштайт. 200 жумушчу орун түзүлөт, аны 700гө чыгаруу планыбыз бар. Гидроэнергетика, машина куруу боюнча долбоорлорду илгерилетип, санаторийлерди жабдуу, туризмди, айыл чарба тармагын өнүктүрсөк болот", — деди Үкүбаев.
Конференция Жалал-Абадда өтүп жатат. Россия менен Кыргызстандын өкүлдөрү кызматташуу, долбоорлорду каржылоо, соода, туризм жана ритейл тармактары боюнча талкуу жүргүзүшүүдө. Программа өнөр жай объектилерин кыдырууну, Россия менен Кыргызстандын региондорунун "Достук" паркына капсула салуу аземин, көргөзмө жана бизнес-сессияларды камтыйт. Иш-чара эки өлкөнүн алакасын бекемдөөнү көздөйт.