2021-жылдан бери Мамлекеттик-жеке өнөктөштүк борборунун инвестициялык портфелинин суммасы миллиард доллардан ашты. Бул тууралуу Эрденет Касымов Sputnik Кыргызстан радиосунда маек куруп жатып билдирди.
Анын айтымында, МЖӨ — мамлекеттик кызматтарды сапаттуу көрсөтүүгө жана инфраструктураны өркүндөтүүгө мүмкүндүк берген альтернативдүү ыкма.
"Мамлекеттик-жеке өнөктөштүк (МЖӨ) боюнча жаңы мыйзам 2021-жылы кабыл алынган. 2019-жылы атайын борбор түзүлүп, ыйгарым укуктуу органдар аныкталган. 2022-2026-жылдарга аталган тармакты өнүктүрүү программасы иштелип чыккан. Учурда мамлекеттик-жеке өнөктөштүк долбоорлорду баалоо, даярдоо жана жеке өнөктөштөрдү тандоо боюнча типтүү документтер жана ар кандай чечимдер даярдалды. 2021-жылдан бери Мамлекеттик-жеке өнөктөштүк борборунун инвестициялык портфелинин суммасы миллиард доллардан ашкан 68 долбоор түзүлдү. Алардын ичинен 20 долбоор боюнча макулдашууга кол коюлду. Ал эми алты долбоор сынак баскычында турат. Ошондой эле 42 долбоор макулдашууга кол коюу үчүн даярдоо баскычында", — деди Касымов.
Ошондой эле ал МЖӨ долбоорлорун мамлекет жана жеке тараптар дагы демилгелей аларын кошумчалады.