БИШКЕК, 11-окт. — Sputnik. Израилдин аскер күчтөрү Газа секторунда ак фосфорлуу ок-дары колдонгонун RT Палестина ТИМине таянуу менен жазды.
Министрлик да аткылоонун видеосун жарыялаган.
"Израилдин оккупациялык күчтөрү Газа секторунун Аль-Карам районундагы палестиналыктарга каршы эл аралык конвенция менен тыюу салынган ак фосфорду колдонушту", — деп жазган министрлик.
Буга чейин ХАМАСтын саясий бюросунун жетекчисинин орун басары Муса Абу Марзук RT эфиринен Газаны блокадалап Израиль эл аралык укук нормаларына ылайык андагы жашоочулардын жоопкерчилигин аларын түшүнүшү керек деп айткан.
Маалымдама
Ак фосфор жарылып жерге 1200-1300 градус температура менен түшөт. Кийимди өрттөп, денеде катуу күйүктөр калат. Уулуу түтүн бөлүнүп чыгат, ага өрт өчүргөн каражаттардын күчү жетпейт. Ак фосфор же өзү күйүп бүтөт, же кычкылтектин жогунан акыры өчөт. Фосфорлуу снаряддарды Кадимки куралдын конкреттүү түрлөрүн колдонууну чектөө же тыюу салуу боюнча конвенциянын негизинде пайдаланууга болбойт.
Палестина-Израиль чыры
7-октябрда Израилге Газа сектору тараптан чабуул жасалганы боюнча маалыматтар тарады. Аталган өлкөнүн билдиргенине караганда, ХАМАС аскерлери ракета менен жапырт аткылаган соң Израилдин түштүгүндөгү чектерине кирип келген дешүүдө. Аталган уюмдун аскер канаты жарыялаган аскердик операциясын "Аль-Аксы топон суусу", ал эми Израиль тарап "Темир кылыч" деп атады. Өлкөнүн премьер-министри Биньямин Нетаньяху элге кайрылып, Израиль узакка созула турган оор согушка киргенин, мындан улам мобилизациялоо жүрөрүн билдирген.
Тараптардын аймактык кызыкчылыгы менен байланышкан палестин-израиль жаңжалы ондогон жылдардан бери региондогу кагылышуунун себепкери болуп келет. СССРдин кийлигишүүсү менен 1947-жылы БУУ Израиль жана Палестина мамлекеттерин түзүү чечимин кабыл алган. Бирок натыйжада Израиль гана түзүлгөн. Тель-Авив эки өлкө принцибине макул болгону менен палестиналык аймактарды бошотпой келет.
Акыркы маалымат боюнча, ХАМАСтын чабуулунан улам Израилде 1000ден ашуун адам көз жумган. Ал эми Палестинанын Саламаттык сактоо министрлигинин билдирүүсү боюнча, Газа секторунда 900дөн кем эмес киши набыт болгон.