БИШКЕК, 10-окт. — Sputnik. Кыргызстанда бөлкө нандын баасы кандай болушу керектиги белгилүү болгонун Монополияны жөнгө салуу мамлекеттик агенттигинин жетекчисинин орун басары Жээналы Орозбаев маалымат жыйында билдирди.
Эскерте кетсек, буга чейин нан жана нан азыктарынын баасын мамлекеттик көзөмөлгө алынары айтылган. Орозбаевдин айтымында, көзөмөл 90 күнгө уланат. Мындай чара социалдык маанилүү азыктын баасын кармап туруу үчүн көрүлдү.
Аталган агенттиктин буйругу жана өкмөттүн токтому менен 1-сорттогу буудай унунан жасалган нандын бир килограммынын дүң баасы Бишкекте 52,5 сом, чекене баасы 62,5 сом деп бекитилди. Калган аймактарда дүң баа 56,5 сом, ал эми чекене нарк 65 сомдун чегине болот.
Орозбаев тандырга жасалган нанга да баа бекитилгенин белгиледи.
"Бишкекте бир килограмм үчүн дүң баа 89, чекене баа 100 сомдон ашпашы керек. Чүй менен Нарында 92 жана 100 сом, Ысык-Көл менен Баткенде 99 жана 116, Талас, Ош менен Жалал-Абадда 89 жана 100-101 сом деп бекитилди", — деди ал.
Анын айтымында, тандырга жабылган токочту жасоо ыкмасы, технологиясы ар аймакта ар башка. Орозбаев буйрукта бөлкө нан сөзсүз 1-сорттогу буудай унунан жасалышы керек экени айтылса, тандыр нан жасоодо андай талап жок экенин белгиледи.
Улуттук статистика комитетинин маалыматы боюнча сентябрдын башында нандын бир килограммы Бишкекте 65 сом болсо, кечээ 67,5 сомго чейин көтөрүлгөн.