БИШКЕК, 10-окт. — Sputnik. Мэрия Бишкекте № 212, № 51, № 42 автобус линияларындагы камералар жол эрежесин бузгандарды каттап жатканын маалымдады.
Белгилей кетсек, жолдогу эрежени одоно бузган айдоочуларды аныктоо үчүн Бишкектеги жаңы автобустарга камералар коюлган. Муниципалитет азырынча үч каттамдагы автобустардын камералары иштеп жатканын кабарлап, жакын арада башкалары да видеокөзөмөл жүргүзө баштаарын кошумчалаган.
"Автобустардагы камераларга көбүнчө аялдамага уруксаты жок токтоп алган, коомдук транспорт үчүн чийилген тилкеде жүргөн же катуу ылдамдыкта бараткан автоунаалар түшүп калат", — деп айтылат маалыматта.
Пилоттук долбоордун алкагында муниципалитеттин кызматкерлери жол эрежесин бузуу фактысы бар-жогун аныктоо үчүн видеолорду көрүп чыгат. Эгер эреже бузулса, патрулдук милицияга жөнөтүлөт.