БИШКЕК, 10-окт. — Sputnik. "Кыргызстан улуттук электр тармагы" ААКы 128,8 миллион сомго 241 трансформатор сатып алды. Бул тууралуу Энергетика министрлигинин маалымат кызматы кабарлады.
Трансформатордун ичинен теңинен көбү, тагыраагы, 152си компаниянын кампаларына алып келинген. Калганы ушул жуманын ичинде келери кошумчаланды.
Маалым болгондой, трансформаторлор бир айдын ичинде республиканын бардык аймактарына орнотулат. Жабдууну Кыргызстан Россиянын "Электрощит - ТМ Самара" компаниясынан сатып алган.
Энергетика министри Таалайбек Ибраев мындай ири сатып алуулар 2023-жылдын 1-майында электр энергиясына тарифти 23 тыйынга (77 тыйындан 1 сомго) жогорулатуунун эсебинен ишке ашырылганын белгилеген.