КМШ жаштарынын Дельфи оюндарынын башкы максаты — таланттуу жаштарды бир аянтчага топтоп, достошууга чакыруу. Бул тууралуу Нусубалы Жакыпбеков Sputnik Кыргызстан радиосунун эфиринде маек куруп жатып билдирди.
Анын айтымында, бул жылы уюштурулуп жаткан Дельфи оюндарына өзгөчө аймактардан өнөрлүү жаштарды катыштырууга аракеттер жасалган.
"КМШ жаштарынын Дельфи оюндарынын башкы максаттарынын бири — ар кайсы өлкөдөгү жаштарды бир аянтчага бириктирип, аларды достошууга чакыруу. Мындай маданий иш-чара жашоого болгон көз карашты өзгөртүп, жаңы максаттардын пайда болушуна шарт түзөт. Саамалык КМШ жаштары бири-бири менен жакындан таанышып, келечекте кат алышып, достук мамилесин сактап калсын деген ниетте уюштурулуп келет. Муну менен катар эле программада конкурстар бар болгондуктан чыгармачылык жактан да өздөрүн өнүктүрүп, тажрыйба топтоого мыкты мүмкүнчүлүк. Барган сайын мамлекет тарабынан маданиятка көбүрөөк көңүл бурула баштады. Керектүү музыкалык аспаптарды сатып алууга каражат бөлүндү. Быйылкы Дельфи оюндарына айылдагы жаштарды тарттык. Анткени көптөгөн ири иш-чараларга Бишкек жана Ош шаарларындагы таланттуулар гана катышып келет. Учурда классикалык аспаптарга кызыккандар аз. Муну аспаптардын санынын аздыгы менен байланыштырсак болот, аймактарда жокко эсе деп айтсак жаңылышпайбыз. Шаарда болобу, айылда болобу, балдарды аспаптар менен тааныштырсак кызыгуу да пайда болмок", — деди Жакыпбеков.
Ал учурунда музыкалык аспаптарды үйрөткөн адистердин көбү маянанын аздыгынан улам жумушун таштап кеткенин кошумчалады.
Белгилей кетсек, Бишкек шаарында 6-10-октябрь күндөрү КМШ жаштарынын XVII Дельфи оюндары өтүүдө.