БИШКЕК, 1-окт. — Sputnik. Россиянын "Ну-ка, все вместе!" музыкалык долбооруна катышкан кыргызстандык ырчы Бек Исраилов All-4-one тобунун I swear ырын аткарып жарым финалга чыкты.
Программада катышуучуларды 100 калыс сындан өткөрөт. Исраилов алардын 99унун добушун алды. Калыстар Исраиловдун аткаруусуна жакшы баа берген сөздөрүн айтышып, кыргызча чыгарма аткаруусун өтүнүштү. Ал сахнада Рыспай Абдыкадыровдун "Биз экөөбүз" аттуу чыгармасын жаңыртты.
"Даңазалуу чыгармаларыбыз дүйнөгө жаңырсын. Жарым финалда да кызыктуу болот. Ага мен сиздердин колдоо менен өттүм", — деп жазды ырчы баракчасына видеолорун жүктөп.