БИШКЕК, 1-окт. — Sputnik. Украина АКШнын каржылоосу болбосо Россия менен согушка туруштук бере албайт. Мындай пикирин Жогорку Раданын депутаты Алексей Гончаренко билдиргенин РИА Новости жазды.
Буга чейин АКШ президенти Жо Байден өкмөттүн ишин каржылоону 45 күнгө — 17-ноябрга чейин уланткан мыйзамга кол койгондугу, мыйзам Конгресс тарабынан жактырылгандыгы маалымдалган. Анда Украинанын керектөөлөрү үчүн каражат бөлүү каралган эмес.
"АКШ — биздин негизги союздашыбыз. Анын колдоосу болбосо биз туруштук бере албайбыз. Кечээ Конгрессте каралгандар жөн салды окуя эмес, бул чоң коңгуроо. Стратегияны өзгөртүү керек. Башка жолду тандоо зарыл", — деп жазган Гончаренко Telegram каналына.
Байдендин Конгресс жактырган мыйзамга кол коюусу АКШдагы "шатдаунду" алдын алды, антпесе өкмөттүн иши 1-октябрда токтомок. Эгерде ага жол берилсе, эң эле маанилүү деген иштерди аткарган мамкызматкерлер маянасыз иштеп, бир тобун мажбурлап өргүүгө чыгарышмак. Бир нече апта мурун АКШ өкмөтү "шатдаундун" кесепети өлкөгө өтө чоң кедергисин тийгизе турганын моюндаган.
Россия буга чейин Украинага курал-жарак берип жатканы үчүн НАТО өлкөлөрүнө нааразылык нотасын жиберген. РФ ТИМинин башчысы Сергей Лавров Украинага багытталган кандай гана курал-жарак жүктөлгөн жүк болбосун, Россиянын мыйзамдуу бутасы болорун айткан. Кремль Украинаны куралдандыруу орус-украин сүйлөшүүлөрүнүн ийгиликтүү болушуна өбөлгө боло албай турганын, мындан негативдүү жыйынтык чыгышы мүмкүн экендигин айткан.
Лавров АКШ менен НАТО Украинадагы жаңжалга түздөн-түз катышып, чырды "курал жөнөтүп эле эмес, Улуу Британия, Германия, Италия жана башка өлкөлөрдө кадрларды даярдап" дагы создуктуруп жатканын белгилеп келет.