БИШКЕК, 27-сен. — Sputnik. Бишкек калаасында 450 миңге чукул автоунаа бар. Автотыгын маселесин чечиш үчүн эки-үч машинасы барлар коомдук транспортко өтүшү керек. Бул туурасында Жаратылыш ресурстары, экология жана техникалык көзөмөл министрлигинин Бишкек — Аламүдүн аймактык башкармалыгынын жетекчиси Нурлан Шаршеев билдирди.
Аткаминер Sputnik Кыргызстандын мультимедиалык борборунда өткөн "Бийлик ыш менен кантип күрөшөт" деп аталган брифингге катышкан.
Анын айтымында, Кыргызстанда баш-аягы 1,5 миллион транспорт болсо, анын 450 миңи Бишкекте.
Жаратылыш ресурстары, экология жана техникалык көзөмөл министрлигинин Бишкек — Аламүдүн аймактык башкармалыгынын жетекчиси Нурлан Шаршеев
© Sputnik / Асел Акмат
"Эгер ушунча сандагы автокөлүктүн ар бири шаарга чыкса, автотыгын көйгөйүн чече албайбыз. Бизде көп үй-бүлөлөрдө эки-үчтөн автоунаа бар. Ыңгайлуулук, комфорт деген нерселерге караганда элдин, муундун ден соолугу алда канча маанилүү. Андыктан коомдук транспортко өтүш керек", — деди Шаршеев.