БИШКЕК, 26-сен. — Sputnik. Чыңгыз Айтматов кош тилдүүлүктүн эталону болгон. Бул тууралуу Россиянын Кыргызстандагы элчиси Николай Удовиченко Кыргыз улуттук университетинде өткөн "Орус тили кызматташтыктын жана өз ара түшүнүшүүнүн көпүрөсү" аттуу тегерек столдо билдирди.
Анын айтымында, орус тили жөнүндө көп жерде түрдүү нерселерди айтууга болот, бирок бул тил мурдагы советтик мейкиндикте өзгөчө орунду ээлейт. Анын чек арасы муну менен да чектелбейт.
© Sputnik / Бакыт Толканов
"Биз, албетте, орус тилин жайылтуу Россиянын тышкы саясатынын артыкчылыктуу багыттарынын бири деп эсептейбиз. Бул багытта жакында эле Кыргызстанда үч орус тилдүү мектептин курулушуна старт берилгени жана кийинчерээк дагы алты мектептин салынары кокусунан жасалган кадам эмес", — деди Удовиченко.
Элчи тегерек столдун катышуучуларынын бири улуу жазуучу Чыңгыз Айтматовду эске салганын белгиледи.
"Менин көз карашым боюнча, Айтматов кош тилдүүлүктүн эталону болгон. Студент үч тилди билгени жакшы, бирок жок дегенде эки тилди өздөштүрүү керек. Мында орус жана кыргыз тилдерин айтсак болот", — деди дипломат.
Ошондой эле ал 1-3-ноябрда Бишкекте орус тилдүү мектептердин директорлорунун форуму өтүп, сабак өтүү маселелери талкууланарын белгиледи.
"Мен сиздердин орус тилин сактоо аракетин колдойм. Бүгүнкү күндө эң башкысы — буга чейин иштелип келген нерселерди жоготуп албоо", — деди элчи.