БИШКЕК, 26-сен. — Sputnik. АКШнын Украинага аскердик жардам берүүсүнө каралган каражаты дагы бир нече жумага жетет. Бул туурасында Улуттук коопсуздук кеңештин стратегиялык байланыштар боюнча координатору Жон Кирбинин айтканын РИА Новости жазды.
Аткаминер CNN телеканалына берген маегинде мындан аркы көмөк Конгресстин кошумча акча бөлүү чечимисиз "аксап каларын" айткан. Кирби мыйзамчыларды 24 миллиард долларды маалкатпай бөлүп берүүгө чакырды. Мунусун Украина күчтөрүнүн контрчабуул кылууга жакшы шарт түзүлүп турганы менен түшүндүрдү.
"Бизде азганактай акча калды. Ал бир нече жумага жетет деп ойлойм. Ал эми сураган кошумча каражаттын бөлүнбөй калышы Украинаны колдогон мындан аркы мүмкүнчүлүктөрүбүзгө таасирин тийгизет", — деген Кирби.
Ал 2024-жылга же кыска мөөнөткө Конгресс тарабынан бюджет бекитилип берилбегендиктен федералдык өкмөттүн ишмердүүлүгүнүн токтоп калышы да Киевге курал-жарак берүүдөгү кесепеттүү нерсе экенин белгилеген. Бул кырдаалдын 1-октябрда жаралып калышы мүмкүндүгүн айткан.
"Кыш келгенде эки армияга тең оор болот. Андыктан, азыр шарт болуп турганда Украинанын аскерлерин зарыл болгон нерсе менен камсыздоону каалайбыз", — деген Кирби.