БИШКЕК, 22-сен. — Sputnik. Кыргызстандык балбан Акжол Махмудов бүгүн дүйнө чемпионатынын финалында азербайжандык Санан Сулейманов менен алтын медаль үчүн күрөшөт.
Мелдештер Сербиянын Белград шаарында өтүп жатат. Sputnik Кыргызстан Махмудовдун каршылашы тууралуу маалымат чогултту.
Балбандар 77 килограмм салмак категориясы боюнча килемге чыгат. Сулейманов финалга жеткенге чейин финляндиялык Жонни Сарккиненди (5:1), АКШдан келген Камаль Амир Бейди (8:0), молдовалык Александрин Гутуну (3:1) жана казакстандык Демеу Жадраевди (5:1) жеңип алган. Ал эми жарым финалда армениялык атаандашы Малхаз Амоянды 5:0 менен утуп чыкты.
Сулейманов 27 жашта, кыргызстандык балбандан төрт жашка улуу. 2012-жылдан тарта күрөш боюнча эл аралык мелдештерге катыша баштаган.
Жетишкендиктери
Кадеттер жана жаштар арасындагы Европа чемпионатынын коло байгесинин ээси.
2018-жылы 23 жашка чейинки (U23) балбандар арасында дүйнө чемпионатында күмүш медаль тагынган. 2020-жылы Европа чемпиону болгон.
Ал эми 2021-жылы Норвегиянын Осло шаарында өткөн дүйнө чемпионатында экинчи орунду ээлеген. Анда алтын байге үчүн күрөштө россиялык белгилүү балбан Роман Власовго утулган.