Быйыл 1 миллион 278 миң нуска менен окуу китептери басылып чыгат. Алардын ичинде мугалимдер үчүн методикалар да болот. Учурда 136 миңи чыкты. Бул тууралуу Төлөгөн Аматов Sputnik Кыргызстан радиосуна билдирди.
Анын айтымында, окуу китептерин чыгаруу үчүн 324 миллион сом каражат бөлүнгөн.
"Буга чейин окуу китептерин жеке басмаканалар чыгарып, министрлик даяр продукцияны сатып алуу саясатын жүргүзчү. Эми президенттин жарлыгы менен бардык окуу китептерин "Учкун" мамлекеттик басмаканасы даярдамай болду. Ал үчүн жалпы 324 миллион сом каражат бөлүнсө, анын 152 миллиону бюджеттен, 172 миллионун китептерди ижарага берүүдөн түшкөн каражат түздү. Аталган акчага эми китептер чыгарылып жатат. Учурда 136 миң даана китеп чыгып, аймактарга таратылууда. Жалпысынан быйыл 1 миллион 278 миң китеп чыгарылат. Мында окуу китептеринен сырткары мугалимдер үчүн методикалар, жумушчу дептерлер да бар. Быйыл 1-класстар үчүн "Алиппе", 7-8-класстар үчүн "Физика", 7-9-класстарга арналган "Информатика", мындан сырткары, "Химия", "Адам жана коом", "Диндердин өнүгүү тарыхы", "Англис тили" китептери жарык көрөт. Республика боюнча кайсы предметтер боюнча канча китеп жетишсиз экенин так айтуу кыйын. Азыр биз китепканачылардын жардамы менен маалыматтарды чогулткан система иштеп чыктык. Анын жыйынтыгы 10-октябрда билинет. Бардык маалымат топтолгон соң биз аны коомчулукка жарыялап, жаңы китеп чыгарууда ушул системанын маалыматына таянабыз", — деди Аматов.
Ал китепти ижарага берүүдөн беш жылда 193 миллион сом чогулганын кошумчалады.