БИШКЕК, 21-сен. — Sputnik. Бүгүн, 21-сентябрда, миграция маселеси боюнча Мамлекеттер аралык ири коомдук кеңештин II жыйыны өттү. Бул тууралуу Эмгек, социалдык камсыздандыруу жана миграция министрлиги билдирди.
Иш-чара ЕЭКтин миграция чөйрөсүндөгү министрликтердин жана ведомстволордун, жарандык коомдун өкүлдөрүнүн, ЕАЭБ жана КМШ өлкөлөрүнүн аналитикалык жана илимий чөйрөлөрүнүн эксперттеринин катышуусунда өттү.
Жолугушуу "Карылар үчүн ресурстук борбор" коомдук бирикмеси, Эмгек, социалдык камсыздоо жана миграция министрлиги жана Жогорку Кеңештин төрагасынын алдындагы Миграция боюнча кеңеши менен биргеликте уюштурулду.
Эмгек министринин биринчи орун басары Нурдөөлөт Базарбаев миграция боюнча өлкөлөр аралык ири коомдук кеңеш бул жааттагы көйгөйлөрдү чечүүнүн эң жакшы жолдорун табуу үчүн ар түрдүү пикирлердин, билимдердин жана тажрыйбалардын бириккен аянтчасына айланат деген ишенимин билдирди.
"Жыйындын жүрүшүндө кеңештин учурдагы ишмердүүлүгү тууралуу маалымат берилип, иш планы жана позициясы талкууланды. Эл аралык катышуучулар өз өлкөлөрүндөгү учурдагы миграциялык абал тууралуу айтып, биргелешкен миграция маселелерин чечүүдө өлкөлөр аралык кызматташууга кызыкдар экендигин билдиришти", — деп айтылат маалыматта.
Миграция маселелери боюнча Өлкөлөр аралык ири коомдук кеңеш (МБК) – миграциялык процесстерди жөнгө салуу жана мамлекеттик органдардын, жарандык коом институттарынын, эксперттик жана илимий коомчулуктардын, бизнес түзүмдөрдүн, ЕАЭБдин, КМШнын, ШКУнун, башка эл аралык түзүмдөрдүн жана бирикмелердин алкагындагы улуттук-маданий бирикмелердин миграция чөйрөсүндөгү кызматташуу механизмдерин өнүктүрүү максатында түзүлгөн өлкөлөр аралык туруктуу иштөөчү эксперттик-консультативдик коомдук аянтча болуп саналат.