Кесиптик лицей жана колледж директорлугуна конкурс эки этап менен өтөт. Биринчисинде тест жүргүзүлсө, андан өткөндөр аңгемелешүүгө киргизилет. Бул тууралуу Расул Абазбек уулу Sputnik Кыргызстан радиосуна айтып берди.
Анын айтымында, учурда конкурстук тесттерди түзө турган жумушчу топ иштеп жатат.
"Ушул жылдын июнь айында министрлер кабинетинин токтому чыккан. Үч ай аралыгында конкурсту өткөрүүгө керек болуучу бардык иштерди уюштуруу биздин министрликке жүктөлгөн. Ага ылайык, кызмат ордунда беш жылдан көп отурган кесиптик лицей жана колледждердин директорлоруна конкурс жарыялоого милдеттүүбүз. Бул бир эле Билим берүү жана илим министрлигине тиешелүү мыйзам эмес. Ошол эле Саламаттык сактоо, Маданият жана маалымат министрлигине караган кесиптик лицей жана колледждерде да бул конкурс өткөрүлөт. Ага жогорку билимдүү, аталган тармакта беш жылдан кем эмес иштеген бардык Кыргыз Республикасынын жарандары катыша алат. Ал эми ээлеген кызматы беш жылдан ашкандар убактылуу жетекчилигин токтотуп, конкурска катышып утуп чыкса, кайра барып ишин уланта берет. Эски жетекчилери өтпөй калган окуу жайлардын директорлугуна жаңылары келет. Конкурс эки этап менен жүрөт. Биринчи тест тапшырууну биз республика боюнча бир учурда өткөрүп, жыйынтыгын үч сааттан кечиктирбей чыгарып беребиз. Экинчи этабында тесттен өткөндөр менен аңгемелешүү болот. Ал коомчулуктун көзөмөлүндө ачык жүргүзүлөт", — деди Абазбек уулу.
Ал конкурстун эки этабы тең видеого тартыларын кошумчалады.