БИШКЕК, 19-сен. — Sputnik. Американын New York Times гезити Константиновкадагы каргаша боюнча өз алдынча иликтөө жүргүзүп, 16 кишинин өмүрүн алган соккуну украин армиясы жасаган деген жыйынтыкка келди. Бул тууралуу РИА Новости жазды.
"New York Times тарабынан чогултулган материалдар жана далилдер, ошондой эле ракетанын фрагменттери, спутниктен тартылган сүрөттөр, күбөлөрдүн көрсөтмөсү жана соцтармактагы жарыяланган маалыматтар сокку "Бук" комплексинен атылган украиналык ракетанын траекториясынан четтеп кетишинен улам урулганын тастыктайт", — деп айтылат макалада.
Эскерте кетсек, сентябрда украин армиясы көзөмөлдөгөн Константиновка шаарынын базарына ракеталык чабуул жасалган. 16 киши каза таап, дагы 33 адам жарадар болгон болчу.
Басылма өз иликтөөсүн Украина президенти Владимир Зеленскийдин АКШга келе турган учурун туштап чыгарды.
Макалада Киев бийлиги гезиттин кабарчыларына ракетанын сыныктарын алууга, ошондой эле сокку урулган жерге кирүүгө тоскоолдук жаратууга аракет кылышканы да белгиленген. Буга карабастан репортёрлор ал жерге жетип, күбөлөр менен сүйлөшүп, снаряддын калдыктарын алууга үлгүрүшкөн.
Гезит жазгандай, сокку урулар алдында ошол жерден өтүп бараткан кеминде эле төрт киши жакындап келе жаткан снаряддын үнүн утурлай, ракета атылган тарапты караганы көрүнүп турат. Жарылуу болор алдында токтоп турган эки автоунаанын үстүнөн учуп бараткан ракета чагылышып түшүп калган. Ракетанын багыты дал ушундай болгонун ошол жерди изилдеген жардыруучу зат боюнча эксперт да тастыктады.
Жергиликтүү тургундар украин күчтөрү фронт линиясы тарапка Дружковка шаарынан эки зениттик ракета учурганын айтып беришкен. Гезиттин ал жактагы журналисттери ракеталар учурулуп жаткан үндөрдү угушканын билдиришкен. Бул тууралуу жашоочулар соцтармакка да жазышкан. Ракета учурулган убакыт менен Константиновкадагы базарга урулган соккунун убактысы дал келүүдө.
Мындан тышкары, күбөлөрдүн бири NYT гезитине ракеталар аскерлер тарабынан байма-бай пайдаланылып келген шаардын чет жакасындагы жерден жасалганын айтып берген. Журналисттер ал жерге да барып, аскер күчтөрү болгонуна ынанышкан.
Басылма сокку урулган жерден табылган фрагменттердин көлөмү "Бук" зениттик-ракеталык комплексинен учурулган 9М38 ракетасынын формасы менен көлөмүнө дал келүүдө деген жыйынтык чыгарган.
Соңунда NYT ракета эмне үчүн Константиновкага түшкөнү түшүнүксүз экенин жазып, иштен чыгып, бутасына жетпей калган болушу мүмкүн экенин божомолдоду. 16 чакырым бул анча алыс эмес аралык, демек, майды да аз короткон, ал эми калганы жерге урулганда жарылып күйүп кеткен. Базардагы ири өрттү ушуну менен түшүндүрүүгө болот.
Константиновкада жарылган ракетаны украин аскерлери учурганын Bild гезитинин антироссиялык позициясы менен таанымал баяндамачысы Юлиан Рёпке да жазган. Ал мындай жыйынтыкка соккунун кадрларын талдап жатып келгенин билдирген болчу.
Ал эми Россиянын БУУдагы туруктуу өкүлүнүн орун басары Дмитрий Полянский 10-сентябрь күнү Батыш менен Киев режими Константиновкага жасалган соккуну Краматорскидеги каргаша ким жасаганы аныкталгандан кийин унуткарылгандай көз жаздымда калтырууга аракет кылып жатканын билдирди.