БИШКЕК, 16-сен. — Sputnik. Маданият, маалымат, спорт жана жаштар саясаты министрлигине караган бардык театр, оюн-зоок мекемелеринин чыгармачылык гастролдору башталды. Бул тууралуу мекеменин маалымат кызматы билдирди.
Бул аракеттер президенттин "Инсандын руханий-адеп-ахлактык өнүгүүсү жана дене тарбиясы жөнүндө" жана "Улуттук нарк жөнүндө" жарлыктарын аткарууга жана каада-салттарды, үй-бүлөлүк, коомдук баалуулуктарды сактоого багытталат.
"Чыгармачылык гастролдор чет элге, Бишкек жана Ош шаарларына, ошондой эле өлкөнүн жети дубанына болмокчу. Чыгармачылык гастролдордо театр, оюн-зоок мекемелери спектакль жана жандуу үн менен концерттик программаларды тартуулашат. Мындай мүмкүнчүлүк президент тарабынан маданият жана искусство тармагына бөлүнгөн акча каражаттын эсебинен ишке ашырылып, каржылоо мамлекеттин эсебинен жүрөт", ― дешти министрликтен.