БИШКЕК, 14-сен. — Sputnik. Президент Садыр Жапаров бүгүн, 14-сентябрда, Тажикстанга Борбор Азия мамлекет башчыларынын V консультативдик жолугушуусуна катышуу үчүн барды. Бул туурасында мамлекет башчынын маалымат кызматынан кабарлашты.
Мамлекет башчыны Душанбенин эл аралык аэропортунан Тажикстандын премьер-министри Кохир Расулзода тосуп алган.
Сапардын алкагында Жапаров Тажикстан президенти Эмомали Рахмон менен эки тараптуу сүйлөшүүлөрдү жүргүзөрү айтылды.
Жапаров менен кошо Душанбеге кеткен делегациянын курамындагылар:
министрлер кабинетинин төрагасынын биринчи орун басары Адылбек Касымалиев;
тышкы иштер министри Жээнбек Кулубаев;
президенттин администрациясынын тышкы саясат бөлүмүнүн башчысы Муратбек Азымбакиев;
Кыргызстандын Тажикстандагы элчиси Эрлан Абдылдаев;
энергетика министри Таалайбек Ибраев.
V консультативдик жолугушууда президенттер көп тараптуу кызматташтыктын актуалдуу маселелерин, регионалдык өз ара кызматташуунун келечегин талкуулаары айтылган.