БИШКЕК, 13-сен. — Sputnik. Түндүк Кореянын лидери Ким Чен Ын РФ лидери Владимир Путин менен болгон жолугушууда Пхеньян Москванын бардык чечимдерин колдой турганын жана мындан ары эки тараптуу мамилелерди өнүктүрүүгө ниеткер экенин айтты. Бул тууралуу РИА Новости жазды.
Эске салсак, Ким Чен Ын Россияга Путиндин чакыруусу менен кечээ, 12-сентябрь күнү, келген. Бүгүн "Восточный" космодромунан Ким Чен Ынды Путин өзү тосуп алды. Жолугушуу учурунда ал чакыруу үчүн ыраазычылык билдирген.
"Биз мындан ары дагы мамилелерди өнүктүрүүнү каалайбыз (Россия менен — ред.). Биз президент Путин менен Россия өкмөтүнүн чечимдерин ар дайым колдоп келгенбиз жана мындан ары да колдой беребиз", — деди Ким Чен Ын.
Ал ошондой эле Россия менен Түндүк Корея ар дайым империализмге чогуу каршы туруп, суверендүү мамлекет курууну жактай турганына үмүт артарын кошумчалады.
Ал эми Путин өз кезегинде жолугушуу Россия менен Түндүк Кореянын ортосундагы дипломатиялык мамиле түзүлгөнүнө 75 жыл толгон маалда өтүп жатканын белгиледи.
"КЭДРди биздин өлкө биринчи болуп тааныган", — деди РФ лидери.