БИШКЕК, 11-сен. — Sputnik. Ливиянын чыгышындагы суу ташкынынан каза болгондордун саны эки миңге чукулдап, дайынсыз болгондор бир нече миңге жетти. Бул туурасында РИА Новости жазды.
Буга чейин Ливиянын улуттук армиясынын (ЛУА) өкүлү Ахмед аль-Мисмари РИА Новостиге үч адам суу ташкынынан каза болгонун билдирген. Суса жана Дерна шаарлары жаратылыш кырсыгы болгон аймак деп жарыяланган. Кийинчерээк Бенгази шаарында Кызыл Жарым Ай уюму 150дөн кем эмес адам каза тапкандыгын билдиришкен.
“Дерне шаарында каза тапкандардын саны эки миңден ашып кетти, дайынсыздар бир нече миң кишиге чамалады”, — деп айтты ливиялык Al-Masar телеканалына парламенттеги өкмөттүн өкүлү.
Буга чейин ливиялык ЖМКлар жекшемби күнү нөшөрлөгөн жамгырдан улам Ливиянын бир топ шаарларын, анын ичинде Эль-Байда менен Дернаны суу ташкыны каптаганын жазышкан. Нөшөр бийликти аэропорттор менен деңиз портторун жабууга аргасыз кылды.
Буга чейин "Даниэль" циклону Грецияны аралап, 4-сентябрдан тарта бүт өлкөдө катуу жамгыр жааган. Ekathimerini басылмасы жаратылыштын кубулушу 14 кишинин өмүрүн алганын, үч адам дайынсыз болуп жатканын жазган. Дүйшөмбү күнү "Даниэль" Египетке, Жер Ортолук деңизине жетерин айтышты.