БИШКЕК, 9-сен. — Sputnik. Элдин баскан жолун, тарыхын баяндап, жеке арзуу-сүйүүсүн зор күүгө салган комузчу, күүчүлөр — калктын нагыз руханий байлыгын алып жүрүүчүлөрү. Бул тууралуу Садыр Жапаров билдирди.
Президент бүгүн, 9-сентябрда, кыргызстандыктарды Комуз күнү менен куттуктады.
"Ар бир улут, ар бир эл өзүнө таандык маданият жана рух дүйнөсү аркылуу өзгөчөлөнөт эмеспи. Кыргыз кыргыз болгондон тарта үч кылдуу керемет комузу менен элибиздин арзуу-арманын, кайгы-кубанычын күүгө салып, урпактарга мурас калтырып келет. Тарыхый булактарда кыргыз комузу үч миң жыл мурун эле чертилгендиги тууралуу фактылар анын эң байыркы музыкалык аспаптардан экендигин далилдеп турат", — деген өлкө башчы.
Илгертен уламыш болуп Чыңгышбай, Абак, Байкабыл, Серкебай, Тайтеке, Арстанбек, Тилен, Кудайберген, Жолбун, Кыдыр аке деген комузчулардын ысымы айтылган болсо, Токтогул Сатылганов, Мураталы Күрөңкөев, Карамолдо Орозов, Ыбырай Туманов, Ниязаалы Борошев, Атай Огонбаев, Шекербек Шеркулов сыяктуу залкарларыбыздын күүлөрү, обондору кыргыз элинин салттуу музыкасынын комузда чертилип ырдалган чыгармаларынын мыкты үлгүлөрү болуп саналарын белгилеген.
"Түшүнгөнгө комуз күүсүнүн мукам үнү тээ байыркы ата-бабаларыбыздын турмуш жолун, жашоо көчүн көз алдыңа элестетип, дил уюткубуздун түпкүрүн сездирет. Илгери комуз үнү ар бир кыргыздын боз үйүндө жаңырып турса, ал эми жыйырманчы жылдары ал чоң концерттик сахналарда шаңшый баштады", — деген Жапаров.
Самара Токтакунова, Болуш Мадазимов, Нурак Абдрахманов, Намазбек Уралиев сындуу комузчуларыбыздын жаратмандыгы жана чеберчилиги, Насыр Давлесов, Асанкан Жумакматов, Чалагыз Исабаевдей залкарлардын аракетинин арты менен комуз оркестрге түшүрүлүп, дүйнө жүзүнө таралганын айткан.
Быйылкы 9-сентябрь — Комуз күнү "күү атасы" саналган Карамолдо Орозовдун 140 жылдык мааракесине дал келгенин эске салган.