БИШКЕК, 7-сен. — Sputnik. 2022-жылдын 14-17-сентябрында Баткен, Лейлек райондорунда жана Баткен шаарында болгон окуялардан улам жабыркаган жарандар үчүн үйлөрдүн курулушу толугу менен аяктады. Бул тууралуу президенттин Баткен облусундагы өкүлү Абдикарим Алимбаев өлкө башчы Садыр Жапаров менен жолугушуу учурунда билдирди.
Облус жетекчиси аймакты социалдык-экономикалык жактан өнүктүрүүгө багытталган долбоорлорду ишке ашыруу боюнча чаралар тууралуу отчёт берген.
"2022-жылдын 14-17-сентябрында Баткен, Лейлек райондорунда жана Баткен шаарында болгон окуялардан улам жабыркаган жарандар үчүн үйлөрдүн курулушу толугу менен аяктады. Мындан тышкары, Баткен районунун Капчыгай жана Достук айылдарынын башкы планы түзүлүп, ага ылайык бул айылдар толугу менен кайра курулган. Бүгүнкү күндө өрттөнгөн үйлөр толугу менен калыбына келтирилип, ички жолдор асфальтталган, жарыктандырылып, ичүүчү суу системасы салынган. Ошондой эле жарандык коргонуу комиссияларынын актыларына ылайык, күйүп кеткен жана капиталдык ремонтко муктаж болгон үйлөрдүн ээлерине толук көлөмдө акча каражаты берилген, машинасынан же малынан ажырагандарга да акчалай компенсациялар төлөнгөн", — деди Алимбаев.
Президент Жапаров мындан ары да Баткен облусуна мамлекет тарабынан өзгөчө көңүл буруларын баса белгиледи. Мамлекет тарабынан бөлүнгөн бардык күч, ресурстардын көлөмү улуттук максаттарды жана милдеттерди аткарууга багытталып жатканы айтылды.
Ал аймактын социалдык-экономикалык абалын, инфраструктурасын өнүктүрүү маселесине өзгөчө көңүл бурууну тапшырып, бардык долбоорлор өз убагында ишке ашырылышы керектигин белгиледи.
Жапаров Баткен облусунун курч маселелерин чечүү жана облусту өнүктүрүү учурдагы күн тартибиндеги приоритеттердин бири экендигине токтолгон.