БИШКЕК, 5-сен. — Sputnik. Жамааттык коопсуздук жөнүндө келишим уюмунун башкы катчысынын орун басары Валерий Семериков Беларуста өтүп жаткан ЖККУ мамлекеттеринин машыгууларын "мыкты" деп баалады. Бул тууралуу РИА Новости жазды.
ЖККУнун "Аскердик бир туугандык-2023" окуу-машыгуулары Беларустун аймагында 1-сентябрда башталган, ал 6-сентябрга чейин уланат. Бул ыкчам-стратегиялык машыгуунун алкагында аталган өлкөдө ЖККУнун Жамааттык күчтөрүнүн "Биргелешкен аракет-2023" машыгуулары, чалгындоо күчтөрү жана каражаттары менен "Издөө-2023" атайын окуу-машыгуулары, материалдык-техникалык камсыздоо каражаттары менен "Эшелон-2023" машыгуусу, медициналык камсыздоо боюнча "Тоскоолдук-2023" атайын окуу-машыгуулары өтүүдө. Мындан тышкары, куткаруучу бөлүктөрдүн "Скала-2023" машыгуусу да жүрүүдө.
"Уюштуруу, пландоо, башкаруу, айтор, бардык жактан алганда машыгуу жогорку деңгээлде болду. Мен "мыкты" деген баа берем", – деген Семериков журналисттерге Минскиде ЖККУнун Координациялык кеңеши боюнча өткөн отурумда.
Семериков окуу-машыгууларга чет мамлекеттерден байкоочу катары чакырылгандарга да анын жүрүшү кызыктуу болгонун белгиледи. Ошондой эле бул жылы ЖККУга Беларусь төрагалык кыларын эскертип, койгон максаттары абдан амбициялуу болуп жатканын кошумчалады.
"Бул приоритеттерди ишке ашыруу үчүн иш-чаралардын тиешелүү планы иштелип чыккан. Ошол план толугу менен аткарылды деп айта алам", — деди Семериков.
"Окуу-машыгуулар терроризм же экстремизм менен күрөшүү, же аскердик кызматташуу маселелерине гана басым жасаган жок. Ал биздин уюмдун бардык багыттарын өзүнө камтыды. Машыгуулар мазмун жагынан да, тажрыйба жагынан да ири масштабда болду. Пландар аткарылууда, демек, анын жыйынтыгы жакшы болот", — деди ал.
Беларустун ӨКМ башчысы Вадим Синявский журналисттерге ЖККУга мүчө мамлекеттердин ӨКМ башчыларынын координациялык кеңешинин отурумунда адатта жыл ичинде аткарылган иштердин жыйынтыгы чыгарылып, кийинки жылга план түзүлөрүн айтты.
"Биз төрагалык кылган мөөнөттө уюмга мүчө мамлекеттердин бул жааттагы түзүмдөрүн адамдарды куткаруу жаатында бириктирсек дедик. Пландалган бардык иш-чаралар Беларустун аймагында гана эмес, ЖККУнун башка мамлекеттеринде да ийгиликтүү ишке ашты. Мындан тышкары, өзгөчө кырдаал маселелери боюнча да активдүү иштерди жүргүзүп, адамдардын өлүмүн алдын алуу боюнча кесиптештерибиз менен тажрыйба бөлүштүк", — деп билдирген Синявский.
Минскиде ЖККУнун өзгөчө кырдаалдар боюнча Координациялык кеңеши өтүүдө. Ага уюмга мүчө мамлекеттердин куткаруу боюнча түзүмдөрүнүн башчылары катышты. Күн тартибине мурда кабыл алынган чечимдердин аткарылышынын отчётторун угуу, мамлекеттердин куткаруучуларынын атайын окуу-машыгууларынын жыйынтыгын чыгаруу жана 2024-жылга карата биргелешкен иш-чараларды пландоо коюлган. Мындан тышкары, калкты жана аймактарды өзгөчө кырдаалдардан сактоодогу илимий-техникалык ишмердүүлүккө жана көп тармактуу атайын адистерди даярдоого өзгөчө көңүл бурулары маалымдалган.