Биз бүгүнкү күнгө чейин Батышты карап келе жатабыз. Батыш болсо "экономиканы өнүктүрүү үчүн стратегиянын кереги жок, эркин рынок шартында өнүгөт, убакыт керек" деп жатат. Бул сөздөргө ишенип биз 30 жылдан ашуун убакыт кетирдик. Эркин рынок шарты бышып жетилиши үчүн дагы канча мезгил талап кылынат деген суроо жаралат. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, Батыштан айырмаланып Чыгышта 5-10 жылда өнүгүү жолуна түшкөн мамлекеттер бар.
"Биз экономиканы өнүктүрүүдө батыштын концепциясын колдонуудан баш тартып, Чыгышты көздөй багыт алууга мезгил келип жетти. Мисал катары ошол эле Япония, Түштүк Корея, Тайвань, Сингапур сыяктуу мамлекеттерди алсак болот. Алар капиталисттик өлкө болгонуна карабай, СССРдегидей беш жылдык пландарды коюшкан, атайын экономиканы көтөрүү үчүн стратегиялык план түзүлүп, ошонун негизинде иш алып барышкан. Биз дагы мына ушундай жолго түшүшүбүз керек. Рыноктук экономикада өзү бышып жетилерин күтүп отура берүү мындан ары туура болбой калат. Биздин коомго ошол эле Батыш тарабынан план түзүп иш алып баруу коммунисттик, керексиз кадам катары сүрөттөлүп калгандыктан, айрым жаштарыбыз ушундай көз карашты карманышат. Бирок бизнести өнүктүрүүдө, экономика секторунда план болбосо болбойт. Андыктан биз батыштын баалуулуктарынан баш тартып, концептуалдык пландар менен иш алып бара турган, өнүккөн Чыгыш Азия мамлекеттеринен өрнөк алчу учур келип жетти", — деди Мамытов.
Ал ислам экономикасы да бизге ыңгайлуу шарт экенин, анда Батыштыкы сыяктуу өзөгүн акча түзбөй турганын кошумчалады.