БИШКЕК, 31-авг. — Sputnik. Президент Садыр Жапаров Ошто шаар калкын таза суу менен камсыз кылган жаңы суу алуучу жайды ишке киргизди. Бул тууралуу анын маалымат кызматы кабарлады.
Мамлекет башчыга суу алуучу жайды расмий ишке киргизүүнүн алдында шаар бийлиги жабдууларды сыноодон өткөрүп, резервуарларды дезинфекциялоодон өткөргөнү маалымдалды.
Маалыматка ылайык, ар бир резервуардын көлөмү 6 миң куб метрди түзөт. Долбоордун баасы 194 миллион сомду түзөт.
Белгилей кетсек, Ош шаарында көп жылдардан бери ичүүчү суу маселеси курч бойдон калып келген. Эгерде мурда сел жана жамгыр учурунда ачык суу сактагычтын — Ак-Буура дарыясынан пайдаланылган суу булганып, суу берүү токтотулуп келген.
Ушул жылдын июль айында мамлекет башчы Ош облусуна болгон жумушчу сапарынын алкагында түштүк борбордун тургундарын ичүүчү таза суу менен камсыздоо маселесин бир айдын ичинде чечүүнү тапшырган. Азыр Ош шаарында ичүүчү суу маселеси чечилгени белгиленди.