БИШКЕК, 30-авг. — Sputnik. Кыргызстандын аймагында TikTok кызматын жайылтуу ишин токтотуу жөнүндө чечим кабыл алынды. Бул тууралуу Маданият, маалымат, спорт жана жаштар саясаты министрлиги кабарлады.
Министрлик мындай чечим кабыл алууга бир катар кайрылуулар негиз болду деген жүйө келтирген. Ведомствого бир катар бейөкмөт уюмдардан TikTok социалдык тармагынын "балдардын психикалык өнүгүүсүнө жана ден соолугуна тийгизген терс жана зыяндуу таасирине байланыштуу тынчсызданган кайрылуулары" көбөйгөн.
"Көптөгөн кайрылууларды эске алуу менен жана жүргүзүлгөн мониторингдин негизинде Маданият, маалымат, спорт жана жаштар саясаты министрлиги Кыргызстандын аймагында TikTok кызматын жайылтуу ишин токтотуу жөнүндө чечим кабыл алды", — деп айтылат билдирүүдө.
Министрликтен "балдардын жаңы калыптанып келе жаткан психикасы али туруктуу эместигин, мындай контент көз карандылыкты жаратып, өсүп келе жаткан муундун эмоционалдык абалына терс таасирин тийгизерин" айтышкан.
Аталган ведомствонун билдиришинче, социалдык тармактын контентине мониторинг жүргүзүлүп, анда TikTok платформасын колдонууда балдардын ден соолугуна, өнүгүүсүнө зыян келтирүүчү маалыматты чектөөлөр жана ошондой эле курактык категорияны көзөмөлдөө функциялары киргизилбей жаткандыгы аныкталган.
Tik Tok кызматын чектөө чечими аны Кыргызстандын мыйзамдарынын алкагында андан ары ишке ашыруу үчүн Санариптик өнүктүрүү министрлигине жөнөтүлгөн.
Жаз айында Жогорку Кеңештин бир катар депутаттары TikTok жаш муунга, улуттук идеологияга терс таасир тийгизип жатат деген пикир айтышкан.