Күмөндөр Абылов 1958-жылы 30-августта Нарын районунун Учкун айылында жарык дүйнөгө келген. Атасы Мукамбет таланттуу комузчу, актер болсо, апасы үй кожойкеси эле. Балалыгы ошол айылда жана Нарын шаарында өткөн. Абылов мектепти бүтөрү менен Токмок шаарындагы маданий окуу жайынын үйлөмө аспаптар бөлүмүндө билим алган. Андан соң Советтик Армиянын катарында үйлөмө аспаптар оркестринде кызмат өтөп, Тянь-Шань райондук маданият үйүндө иштеген. 1979-жылдан тарта Нарын облустук Муратбек Рыскулов атындагы музыкалык драма театрында аккордеонист, артист болуп эмгектенип, кийин кинофильмдерде роль жаратып көрүүчүлөргө таанылган. Ондогон обондору ырчы, аткаруучулардын репертуарынан орун алган. 40тан ашык интермедия-монологдордун, төрт спектаклдин музыкалык жасалгасынын автору азыр да чыгармачылык менен алек.