Кыргызстанда 205 миңден ашык адамдын майыптыгы бар, анын 39 миңин балдар түзөт. Бул тууралуу Жаңыл Акбаева Sputnik Кыргызстан радиосунун эфиринде маек куруп жатып билдирди.
Анын айтымында, медициналык-социалдык экспертиза боюнча жаңы токтом даярдалып, көйгөйлөрдү чечүүнүн жаңы жолдору каралат.
"Кыргызстанда мүмкүнчүлүгү чектелген адамдарды социалдык коргоо, колдоо боюнча иштер жүрүшү керек. Өлкөдө жылдан-жылга майыптык алгандардын саны өсүүдө. Учурда 205 миңден ашык адамдын майыптыгы бар, анын 39 миңин балдар түзөт. Ал эми жылына 60 миңге жакын адам майыптуулук категорияларын алуу үчүн каттоодон өтөт. Мунун көп факторлору бар. Ошондуктан медициналык-социалдык экспертиза боюнча жаңы токтом даярдалып, көйгөйлөрдү чечүүнүн жаңы жолдору каралууда. Мындан тышкары, оорулардын жаңы түрлөрү да киргизилип жатат", — деди Акбаева.
Ошондой эле адис майыптыкты аныктоо эрежелери өзгөрүп эл аралык классификациянын негизинде каттоодон өтөрүн кошумчалады.