Баңгизаттарды мыйзамсыз жүгүртүүгө каршы күрөшүү кызматы атайын операциялар отрядынын жардамы менен шектүүлөрдү кармаганын ИИМдин маалымат кызматы билдирди.
Анын жүрүшүндө эл аралык баңгизат тобунун мүчөлөрү: 28 жаштагы Т.Т.Т. жана 27 жаштагы Ж.А.А. колго түштү. Операция учурунда алар бир топ каршылык көрсөтүп, жашынууга аракет кылышкан. Ушуга байланыштуу ок чыгарган курал жана атайын каражаттар колдонулганы айтылды.
Кийин ыкчам иликтөө учурунда 20 жаштагы О.Л.А. аттуу кыз кармалган. Ал баңгизатты таңгактап, мессенжерлер аркылуу сатып, Кыргызстандын бардык аймагына жөнөтүп жүргөнү белгиленди. Баңгизат мафиясын чет өлкөлүк кураторлор көзөмөлдөп турган. Иштин натыйжасында милиция 28 миң таңгак мефедрондун (психотроптук зат) тарап кетүүсүнө бөгөт койгон. Ал 25,8 млн. сомго сатылмак.
"Т.Т.Т. менен Ж.А.А. узак убакыт бою баңгизаттардын ири партияларын сатуу үчүн чек арага чектеш өлкөлөргө ташуу жана чет өлкөлөргө жөнөтүү менен активдүү түрдө алектенишкен. Ал эми 2003-жылы туулган О.Л.А. көп убакыттан бери Россиянын Волгоград шаарында баңгизатты белгилүү бир дарекке таштап кетүү менен шугулданган", — деп айтылат маалыматта.
Жогорудагы факт боюнча ИИМдин Тергөө кызматы тарабынан Кылмыш-жаза кодексинин 282-беренесинин 3-бөлүмү менен иш козголгон. Ал "Баңгизат каражаттарын, психотроптук заттарды жана алардын аналогдорун ири өлчөмдө сатып өткөрүү максатында мыйзамсыз даярдоо" деп аталат.
Учурда бул кылмышка тиешеси бар башка адамдарды аныктоо жана өлкө аймагына өзгөчө ири өлчөмдөгү баңгизатты алып келүүчү каналдарды жабуу боюнча ведомстволор аралык кошумча иш-чаралар жүргүзүлүүдө.
Тема боюнча: