Ушул жылы Болгарияда өткөн 20 жашка чейинки спортчулар арасындагы дүйнө чемпионатында күмүш байге утуп, Беларустун Минск шаарындагы II КМШ оюндарынын чемпиону болдум. Бул жеңиштер олимпиадалык кыялымды орундатууга жакындатты. Бул тууралуу Нурзат Нуртаева Sputnik Кыргызстан радиосунун эфиринде маек куруп жатып билдирди.
Анын айтымында, кыргыз балбан кыздарынын Олимпиадада байге алуу мүмкүнчүлүгү жогорулап калды.
"Күрөштү 15 жашымда Таластагы айылымда баштагам. Мындай чечимге башында ата-энем каршы болгон. Ошол себептен күрөшкө кечирээк келдим. Айылымда күрөш залы болбогондугу үчүн коңшу кыштакка барып машыгып, кайра келип жүрдүм. Улан Романкулов деген агайдын колуна барып, көшөрүп жүрүп жазылгам. Телевизордон Айсулуу Тыныбекова, Мээрим Жуманазарова эжелердин жетишкендиктерин көрүп, Олимпиадада байге алса болот турбайбы деген ой келген. Айылдан өсүш кыйын деп, Бишкекке жөнөгөм. Шаарда Рыскулов Азамат, Үсөнаалы, Максат деген машыктыруучуларга келип, бүгүнкү күнгө чейин агайлар мелдештерге даярдап келишет. Ушул жылы Болгарияда өткөн 20 жашка чейинки спортчулар арасындагы дүйнө чемпионатында күмүш байге утуп, Беларустун Минск шаарында өткөн II КМШ оюндарынын чемпиону болдум. Бул жеңиштер олимпиадалык кыялымды орундатууга жакындатты. Сентябрда Сербияда күрөш боюнча дүйнө чемпионаты өтөт. Мен алгачкы ирет чоңдор арасында күчүмдү сынап, өлкө намысын коргойм", — деди Нуртаева.
Ошондой эле адис спортто жакын адамдардын, күйөрмандардын колдоосу абдан маанилүү экендигин айтып, өлкө алдындагы жоопкерчиликти сезерин кошумчалады.