БИШКЕК, 25-авг. – Sputnik. Кыргызгидромет шашылыш билдирүү таратты. Ага ылайык, 27-28-августта өзгөрүлмөлүү аба ырайына жана күтүлүп жаткан нөшөрлүү жаан-чачынга байланыштуу республиканын тоолуу жана тоо этектериндеги райондордо сел жүрүшү мүмкүн.
ӨКМ кокту-колоттордон топтолгон селди алдын алуу максатында үй жанындагы арыктарды, дренаждык каналдарды тазалоону сунуштайт.
"28-29-августта абанын температурасы төмөндөп, Чүй өрөөнүндө түнкүсүн 8…13, күндүз 18…23, Талас өрөөнүндө түнкүсүн 4…9, күндүз 17…22 градус болот", — деп айтылат маалыматта.
Ал эми Ош, Жалал-Абад, Баткен облустарынын өрөөндөрүндө түнкүсүн 9…14, күндүз 21…26, Ысык-Көл ойдуңунда түнкүсүн 4…9, күндүз 13…18, Нарын облусунун дыйканчылык аймактарында түнкүсүн 1…6, айрым жерлеринде 0…-2 градус суук, күндүз 13…18ге жетет.
Республиканын тоолуу райондорунда түнкүсүн 0…5, күндүз 7…12, бийик тоолордо түнкүсүн -3…-8, күндүз 1…6 градуска чейин болушу күтүлөт.
Батыштан соккон шамалдын ылдамдыгы секундасына 4-9 метрден айрым жерлерде 15-20 метрге жетиши күтүлөт.
Мындай туруксуз аба ырайы автоунаа, энергетика жана коммуналдык кызматтардын ишин, ошондой эле жайыттарда мал кармоону жана айыл чарба жумуштарын кыйындатат.