БИШКЕК, 25-авг. — Sputnik. Бишкек мэриясы Эгемендүүлүк күнү, 31-августта жана аны утурлай Бишкек шаарында боло турган иш-чаралар боюнча маалымат жарыялады.
2023-жылдын 31-августунда кечки саат 19.00дө борбордук "Ала-Тоо" аянтында эстрада жылдыздарынын катышуусу менен майрамдык концерт өткөрүлөт.
Ленин району
2023-жылдын 31-августунда саат 10:00дө Ак-Өргө, Арча-Бешик конуштарында, Юлиус Фучик атындагы сейил багында аркан тартыш, ордо, тогуз коргоол, шашки түрлөрү боюнча мелдештер болот.
Октябрь району
2023-жылдын 31-августунда саат 10:00дө "Ден соолук" сейил багында мини футбол, волейбол, балдардын жеңил атлетикасы, стритбол, эстафета, ордо, аркан тартыш, таяк тартыш, тогуз коргоол боюнча мелдештер өткөрүлөт.
Ушул эле күнү дагы бир аймакта — Дайыр Асанов атындагы паркта эстафета, аркан тартыш, таяк тартыш, ордо, тогуз коргоол, шахматтын түрлөрү боюнча мелдештер уюштурулат. Ал эми кеч курун саат 18:00дө ушул эле сейил бакта тамак-аштын, музыканын жана суусундуктардын FOODFEST 2023 фестивалы өтөт.
Саат 15:00дө "Ынтымак-2" сейил багында кайрымдуулук жарманке уюштурулат.
Биринчи май району
2023-жылдын 29-августунда саат 10:00дө Бишкек шаардык социалдык стационардык мекемесинде театралдашкан "Кыргыз жерим асыл мурасым" аттуу концерттик программа уюштурулат;
31-августта (болжол менен саат 14:00) Кайназарова жана Профсоюз көчөлөрүнүн кесилишинде концерттик чакан программанын коштоосунда балдар аянтчасынын ачылышы пландалууда;
Ушул күнү саат 12:00дө "Коломто" муниципалдык мекемесинде майрамдык түшкү тамак уюштурулмакчы.
Саат 10:00дө Калыс-Ордо, Көлмө конуштарында, Жаштар сейил багында ордо, шахмат, аркан тартыш, тогуз коргоол, стол теннисинин түрлөрү боюнча мелдештер өткөрүлөт.
Свердлов району
2023-жылдын 30-август күнү саат 10:00дөн 13:00гө чейин "Кара жыгач" сейил багында майрамдык иш-чаралар болот. Парктын аймагы шарттуу түрдө бир нече зонага бөлүнөт. Алар — маданият, көңүл ачуу оюн-зооктору болчу жерлер. Ден соолук жана спорт тармагындагы иш-чаралар өзүнчө жерлерде уюштурулмакчы. Булардан сырткары чыгармачылык көрсөтүү, тамак-аш зонасы да бар.
31-августта саат 10:00дө №11 орто мектептин базасында, "Кара жыгач" багында, Энесай жаны конушунда, Учкун кичи районунда тогуз коргоол, эстафета, аркан тартыш, ордо, таяк тартыш, кичи футбол, стол тенниси боюнча мелдештер өткөрүлөт.
Мындан сырткары, билим берүү уюмдарында Эгемендүүлүккө карата стенддер орнотулуп, класстык сааттар өткөрүлөрү айтылды. Балдардын чыгармачылык борборлорунда "Мекеним менин Кыргызстан!" деген темада концерттик программалар жана мастер-класстар уюштурулат.
Мэрия шаардыктар арасында өзгөчө түшүндүрүү иштери болорун айтты.
"Эгемендүүлүк күнгө карата иш-чаралардын алкагында мал союуга тыюу салуу боюнча калк арасында түшүндүрүү иштери жүргүзүлөт", — деп жазылган мэриянын тараткан маалыматында.