БИШКЕК, 24-авг. — Sputnik. Ош облусунун Кара-Суу районунда кош бойлуу жубайына бычак урган деген шек менен күйөөсү кармалды. Бул туурасында облустук милициянын маалымат кызматы билдирди.
Кечээ, 23-августта, түнкү саат 23:30дар чамасында Кара-Суу РИИБине кош бойлуу келин оор жаракат менен ооруканага кайрылгандыгы боюнча маалымат түшкөн.
Бул факт маалыматтык-электрондук журналга катталып, текшерүү иштери башталган. Анда Кара-Суу районунун 40 жаштагы тургуну Л.И. өз үйүндө пикир келишпестиктен улам 33 жаштагы С.И аттуу аялын учтуу нерсе менен сайып жибергендиги аныкталган. Жабырлануучуну туугандары Ош облустук төрөт үйүнө жеткизишкен.
Ыкчам-тергөө тобу окуя болгон жерге чыгып, жабырлануучуга карата соттук-медициналык экспертиза дайындалган. Күбөлөр суралууда.
Бул окуя боюнча кош бойлуу аялды өлтүрүүгө аракет кылуу беренеси менен иш козголуп, кылмышка шектелген күйөөсү Кара-Суу РИИБинин убактылуу кармоочу жайына киргизилди.
11 Баш оона 2023, 16:45