БИШКЕК, 22-авг. — Sputnik. Россиянын Украинадагы атайын операциясына ыктыярдуу түрдө катышкан Аскар Кубанычбек уулуна чыккан өкүм Жогорку сотто каралды.
Кыргызстандык жигит быйыл 16-майда 10 жылга эркинен ажыратылган. Бүгүнкү сот отурумунда төмөнкү эки инстанцияда кабыл алынган чечим каралды. Өкүмгө нааразы болгон айыпкер апелляциялык арыз жазган, анын жактоочулары Кубанычбек уулу атайын аскердик операцияга жалданма болуп эмес, аскер кызматкери катары катышканын билдирди.
Андан соң судья материалды толук карап чыгуу үчүн отурумду 30-августка жылдырды.
Аскар Кубанычбек уулу 2023-жылдын январь айында атасынын ооруп калганын угуп Кыргызстанга келгенде атайын операцияга катышкан деп камакка алынган. Сотто ал согуш талаасына өз ыктыяры менен барганын, Россиянын жарандыгын алууну каалап жүргөнүн билдирген.
Кыргызстандык Россиянын бийлигине кайрылып, ага жарандык берүүнү өтүнгөн. РФ ТИМи буга дароо реакция кылып, маселе каралып жатканын билдирген.