БИШКЕК, 21-авг. — Sputnik. Ички иштер министри Улан Ниязбеков баңгизат соодасына шектелип кармалган кызматкерлердин айынан иштен алынган жетекчилер тууралуу комментарий берди.
Министр Эгемендүүлүк күнү, окуу жылынын башталышы, Ленин районунда кайра шайлоо учурунда коопсуздукту камсыздоо туурасында онлайн-кеңешме өткөргөнү белгиленди.
"Баарыңыздарга белгилүү болгондой, мыйзам бузуп кармалган ички иштер органдарынын айрым кызматкерлерине байланыштуу жүктөлгөн милдеттерди так аткарбаганы жана өздүк курам арасында жетиштүү иш алып барбагандыгы үчүн айрым жетекчилер боюнча чечимдерди кабыл алдык. Бул акыркы чечим эмес. Анткени буга чейин болуп өткөн коллегияларда, аппараттык кеңешмелерде "эл үчүн таза иштегиле, өздүк курамга катуу көңүл бургула" деген бир катар тапшырмаларды бергенбиз. Жакынкы арада ушуга окшогон дагы бир топ чечимдерди кабыл алып, мындан да катаал чараларды көрөбүз", — деди Ниязбеков.
Ошондой эле ал жаңыдан кызматка дайындалган жетекчилерге кыска мөөнөттүн ичинде бардык кемчиликтерди жоюп алгылыктуу иш алып барууга тапшырма берген.
Белгилей кетсек, УКМК ИИМдин Баңгизаттарды мыйзамсыз жүгүртүүгө каршы күрөшүү кызматында иштеген беш милиционерди кармаган.
Милиционерлер тобу мессенджерлер аркылуу синтетикалык баңгизаттарды колдонгон адамдарды аныктап, бирок алардан акча талап кылышканы айтылган. Анда кармалгандар 20 миң сомдон 5 000 долларга чейин берүүгө аргасыз болушкан. Милиционерлер акча алгандан кийин фактыларды жашырып, аларды бошотушканы маалым болгон. УКМК бул сыяктуу 200дөн ашуун факт аныкталганын билдирген.
Андан соң бир нече жетекчи жумуштан кеткен.