БИШКЕК, 19-авг. — Sputnik. "Барселона" менен Бразилия курама командасынын легендасы Ривалдо кыргызстандыктарга кайрылды.
Ал август айынын соңунда Бишкекке келерин жана бул өлкөдө футбол ойноого кубанычта болорун айтты.
Ривалдо 1997-жылдан 2002-жылга чейин "Барселона" үчүн ойногон. Анын курамында жүргөндө бир нече титулдарды утуп, эки ирет Испаниянын чемпиону аталган. 1999-жылы беделдүү "Алтын топ" сыйлыгына татыган (дүйнөнүн мыкты оюнчусу). 2002-жылы Бразилиянын дүйнөлүк чемпионатта жеңишке жетишине чоң салым кошкон.
Эске салсак, "Барсанын" легендарлуу мурдагы оюнчулары Роналдиньо, Карлес Пуйоль, Ривалдо жана башкалар август айынын соңунда Кыргызстанга келишет. Алар испаниялык клубдун Жалал-Абаддагы академиясынын ачылыш аземине катышат. Ушундай эле академиянын Бишкектеги имаратынын курулушуна капсула салуу пландалууда. Франшизаны жергиликтүү компания сатып алган. Анын алкагында "Барса" менен Борбор Азия легендаларынын жолдоштук беттеши уюштурулат.