БИШКЕК, 17-авг. — Sputnik. АКШ Украинага заманбап аскер техникасын анын баары Россиянын эле эмес Кытайдын да колуна түшүп, жашыруун маалыматтар ачыкка чыгып кетет деген тобокелчиликтен улам жөнөтпөй жатат. Бул тууралуу америкалык аскерий эксперт, АКШнын Ирактагы согушунун ардагери Мэтью Хо Judging Freedom YouTube каналына берген маегинде билдиргенин РИА Новости жазды.
"Дал ушул себептен америкалыктардын Украинага Abrams танкаларын бергиси келген эмес. Азыр убадаланган 40ка чукул танканын алтоо келет. Бул Перс булуңундагы согуш башталганга чейин чыккан M1A1 эски модель (1984-жылы чыгарыла баштаган — ред.). Украинага жаңы танкаларды бербегенибиздин башкы себеби, менимче, аларды колго түшүп калышын каалабаганыбызда. Abrams танкасындагы соот — бул өтө катуу корголгон жашыруун сыр, андыктан анын кандайча түзүлүп, кандайча пайдаланыларын орустар билбеши керек", — деди ардагер.
Эксперт мындай абалга америкалыктар спутник системасы менен башкарылган HIMARS ракеталарынан улам кабылганын эскертти. Анын айтымында, россиялык күчтөр аны зыянсыздандырууну үйрөнүп алышкан. Хо дал ушул себептен АКШ Украинага ATACMS баллистикалык ракеталарын бербей жатат деген пикирде.
"Бул ракеталардын кандай иштээрин орустар билип тим болбостон, маалыматтарды Кытайга да бериши толук мүмкүн. Кытай менен каршылашуу америкалыктарды чындап эле тынчсыздандырып келет. Биз алардын курал-жарагыбыз тууралуу бир нерсе билүүсүн каалабайбыз", — деди эксперт.
Буга чейин "Армия-2023" эл аралык аскердик-техникалык форумунун алкагында "Патриот" паркында Россиянын Коргоо министрлиги Украинада жүрүп жаткан атайын операция маалында олжолонгон техниканы көрсөткөн. Ведомство экспозиция былтыркы жылдын августунан тарта түзүлө баштаганын белгилеген эле. Бул убакыт аралыгында министрлик курал-жарак менен техниканын 870 бирдигин чогултууга үлгүргөн.
Өзгөчө көңүл АКШ жана НАТОдон чыккан техникага бурулган. Мында австралиялык сооттолгон Bushmaster машиналары, америкалык БТР М-113, шведдердин CV90-40 аскердик машинасы жана франциялык AMX-10RCR дөңгөлөктүү танкалары тууралуу сөз болууда.